«Электрондық қаржы орталығы» акционерлік қоғамы мен БҰҰ Сауда және даму жөніндегі конференциясы (ЮНКТАД) «АСТАНА-1» ақпараттық жүйесі жобасы бойынша алты жылдық ынтымақтастықтың нәтижелерін талқылады.
«АСТАНА-1» ақпараттық жүйесі — әлемнің 100-ден астам елінде енгізілген халықаралық ASYCUDA платформасының жетілдірілген нұсқасы болып табылады. Жүйе кедендік әкімшілендіру саласындағы халықаралық стандарттар мен озық тәжірибелерге толық сәйкес келеді.
ЮНКТАД пен ҚР Қаржы министрлігінің Мемлекеттік кірістер комитеті бірлесіп енгізген «АСТАНА-1» ақпараттық жүйесі еліміздегі электрондық кедендік декларациялау деңгейін айтарлықтай арттыруға мүмкіндік берді. Бұл бірқатар артықшылықтар берді, соның ішінде:
- 100% электрондық декларациялауға көшу;
- кедендік рәсімдеу уақытын бір минутқа дейін қысқарту;
- негізгі кедендік рәсімдерді автоматтандыру.
«Электрондық қаржы орталығы» АҚ 2020 жылдан бастап «АСТАНА-1» ақпараттық жүйесі жобасын сүйемелдеп келеді. Жүйе тәулік бойы (24/7) жұмыс істейді, бұл бизнеске құжатсыз декларациялауға мүмкіндік беріп, КГД қызметкерлерімен тікелей байланыс қажеттілігін барынша азайтады. Қолданылу кезеңінде жүйе арқылы 11 миллионнан астам декларация рәсімделді.
Ынтымақтастық басталғаннан бері тараптар Қазақстан Республикасы мен ЕАЭО заңнамасы аясында бірқатар маңызды бастамаларды бірлесе жүзеге асырып, жүйені 30%-дан астам жетілдірді.
Атап айтқанда, келесі бастамалар сәтті енгізілді:
- теміржол көлігімен тасымалданатын транзиттік декларацияларды автоматты тіркеу және автоматты шығару;
- халықаралық пошта жөнелтілімдерінің электрондық саудасына арналған пилоттық жобаны іске асыру;
- «АСТАНА-1» жүйесінде бірыңғай жеке шот құру;
- Қытай Халық Республикасымен ақпарат алмасуды ұйымдастыру;
- халықаралық автокөлік тасымалдары бойынша алдын ала ақпарат ұсыну мүмкіндігін енгізу.
Алты жылдық ынтымақтастық кедендік рәсімдеу мерзімдерін айтарлықтай қысқартуға, рәсімдердің ашықтығын арттыруға және сыртқы экономикалық қызметке қатысушыларға көрсетілетін қызметтердің сапасын жақсартуға мүмкіндік берді.
«Электрондық қаржы орталығы» АҚ кедендік әкімшілендіруді цифрландыру саласындағы кешенді реформаларды табысты іске асыруға мүмкіндік беріп отырған ЮНКТАД ұйымының сараптамалық және әдістемелік қолдауын жоғары бағалайды.